يالعنبوها طبيعه..؟
مجروح طحت وقمت في صوت مجروح
آنا خدين الضيق ولاّ رضيعه
عادي تكلم دامها بوح في بوح
هـ الضيق ما يرح صدورٍ وسيعه
صفّرّة يافصل العمر بـ أول البوح
ما كن فصلك توّ مـ اورق ربيعه
لو ما الشتا ما وشـ..وشـ الغصن يالدوح
ولا النار ترجف تحت رحمة صقيعه
حاديني لـ شيبٍ عفاره من النوح
عودٍ يدوّه لي وانا بـ راس ريعه
وأجيه ادرهم كل ما حنّت جروح
جردٍ من الضيقات شهب ومريعه
واقوم اقشـ...قشـ يابس العمر واروح
اشب جذوَة خافقي من جزيعه
وأقلّط بـ ناري من الجوع كم دوح
ولا آكل الاّ ضيق نفسٍ وجيعه
يالين صارت ضيقتي طبع للروح
طبيعه ....ويا لعنبوها طبيعه
قلت استفز اقلام من غطرست لوح
لا علّني آثور للي هزيعه
نفسٍ خذاها الحزن من راس طح طوح
تبغى الطليعه .....بس وين الطليعه
دام الوجع يثعابها لا غفى الضوح
في وجه ليلٍ ما فزع لي شجيعه
لكن ورب اللي قسم بينّا روح
يـ أني لا آطيع الضيق لو ما استطيعه
ما غير ضيقة صدر يومين وتروح
وشلون لو ضاقت عليّ الوسيعه
محمد ابن ساقان
